పాకిస్థాన్‌పై ఆసీస్ ఓటమి.. 2-1తో సిరీస్ గెలిచిన పాకిస్థాన్!

పాకిస్థాన్‌తో జరిగిన తొలి వన్డే మ్యాచ్‌లో విజయం సాధించిన ఆస్ట్రేలియా.. ఆ తర్వాత వరుసగా రెండు మ్యాచ్‌లు ఓడి సిరీస్‌ను కోల్పోయింది. మూడో వన్డే (ఆఖరి) మ్యాచ్‌లో పాకిస్థాన్ ఘన విజయం సాధించింది. తద్వారా ఆసిస్‌తో జరిగిన సిరీస్‌ను 2-1తో దక్కించుకుంది.

పెర్త్‌ వేదికగా జరిగిన మూడో వన్డే మ్యాచ్‌లో ఆసీస్ జట్టు టాస్ గెలిచి బ్యాటింగ్ ఎంచుకుంది. నిర్ణీత 50 ఓవర్లలో 140 పరుగులు మాత్రమే చేయగలిగింది. ఈ మ్యాచ్ కోల్పోవడానికి ప్రధాన కారణం వరుస వికెట్ల పతనమే. ఓపెనర్ డేవిడ్ వార్నర్ ఏమాత్రం సహకరించలేకపోయాడు. అతను ఐదు బంతుల్లో మూడు పరుగులు మాత్రమే సాధించి ఔటయ్యాడు. ఆల్ రౌండర్ మిచెల్ మార్ష్ కూడా ఓపెనర్‌గా వచ్చి ఏడు పరుగులే చేశాడు. ఆ జట్టులో ట్రావిస్ హెడ్ అత్యధికంగా 28 పరుగులు సాధించాడు. ముగ్గురు క్రీడాకారులు 20 పరుగుల మైలురాయిని దాటారు. ఓడిపోయిన ఆసీస్‌కు చేదు అనుభవం ఏమిటంటే.. చివరి ఏడు వికెట్లు 94 పరుగులకు కోల్పోవడమే. పాకిస్థాన్ బౌలర్లలో నసీమ్ షా మూడు వికెట్లు, షాహీన్ ఆఫ్రిది మూడు వికెట్లు, హరీస్ రౌఫ్ రెండు వికెట్లు తీశారు.

అనంతరం బ్యాటింగ్‌కు దిగిన పాకిస్థాన్ జట్టు.. ఆసీస్ బౌలర్లను చీల్చి చెండాడింది. ఓపెనర్ ఫకర్ జమాన్ 10 బంతుల్లో 18 పరుగులు చేసి ఔటయ్యాడు. మరో ఓపెనర్ ఇమాముల్ హక్ 15 బంతుల్లో 19 పరుగులు చేశాడు. అయితే, మధ్య సరీలో బ్యాటింగ్‌కు దిగిన మహ్మద్ రిజ్వాన్ 22 బంతుల్లో 29 పరుగులు చేసి టాప్ స్కోరర్‌గా నిలిచాడు. షాన్ మసూద్ 24 బంతుల్లో 18 పరుగుల చేశాడు. సఫరాజ్ అహ్మద్ 26 బంతుల్లో అజేయంగా 25 పరుగులు సాధించాడు. వన్డే సిరీస్‌ను నెగ్గిన పాక్ ఆటగాళ్లు సంతోషం వ్యక్తం చేశారు.

పాకిస్థాన్‌తో జరిగిన తొలి వన్డేలో ఆస్ట్రేలియా ఆరు వికెట్ల తేడాతో గెలిచింది. రెండో మ్యాచ్‌ అనూహ్యంగా 88 పరుగుల తేడాతో ఓడిపోయింది. మూడో వన్డేలోనూ ఏడు వికెట్ల తేడాతో ఓడిపోవడం గమనార్హం. ఆస్ట్రేలియా జట్టు పేలవమైన పనితీరు కారణంగానే సిరీస్ కోల్పోయిందని విమర్శలు వస్తున్నాయి. మరోవైపు పాక్ బౌలర్ల అద్భుతమైన ప్రదర్శనతోనే గెలిచిందని చర్చించుకుంటున్నారు. ఇక ఆసీస్‌తో జరగనున్న తదుపరి మ్యాచ్ నవంబర్ 11న అడిలైడ్ వేదికగా నిర్వహించబడుతుంది.